Գեղարքունիքի մարզի Գագարին գյուղում սկսել է գործել մեծ ջերմոցային տնտեսությունը։ Այն զբաղեցնում է 4 հա տարածք, ընդհանուր ներդրումը կկազմի մոտ 9 մլն դոլար։
«Այսօր արդեն ներդրվել է մոտ 7 մլն դոլար։ Առաջին երկու հեկտարի վրա կառուցված ջերմոցը շահագործման է հանձնվել այս տարվա սեպտեմբերին։ Արդեն տեղադրվել են բոլոր անհրաժեշտ սարքավորումներն ու սածիլները, որոնք կենսունակ են և ցույց են տալիս բավարար և անհրաժեշտ աճ։ Սածիլները բերվել են Հոլանդիայից, վեց տեսակի են։ Մեկուկես ամսից մենք շուկայական բերք կստանանք.
Այժմ աշխատանքներ են տարվում հաջորդ երկու հեկտարի վրա ջերմոց կառուցելու ուղղությամբ։ Այն նախատեսվում է շահագործման հանձնել 2023 թվականի հունվարի վերջից։
Ընդհանուր առմամբ կստեղծվի 90 մշտական աշխատատեղ։ Ջերմոցում միայն հոլանդական վարդեր են աճեցնելու։ Գագարինի ջերմոցային տնտեսության գործունեության շնորհիվ աղքատությունն ու գործազրկությունը կնվազեն, գյուղացիական տնտեսությունների սոցիալական վիճակը զգալիորեն կբարելավվի»,- ասաց ջերմոցային տնտեսության տնօրեն Արշակ Համբարձումյանը։